Ilham toxti ependi xitaydiki millet uqumini suslashturush xahishi heqqide toxtaldi

Muxbirimiz méhriban

2012-07-26

Xitay merkizi milletler uniwérsitétining dotsénti, musteqil tetqiqatchi ilham toxti ependi radiomiz ziyaritini qobul qilip, 5-Iyul ürümchi weqesidin kéyin, xitayda barghanche küchiyiwatqan millet uqumini suslashturush xahishi heqqide öz qarashlirini bayan qildi.

AFP

Ilham toxti ependi léksiyige kirishtin burun sirtni közetmekte. 2010-Yili 12-Iyun béyjingda.

Yéqindin buyan xitaydiki tor béketliride merkizi milletler uniwérsitéti qatarliq birqanche mektep namining inglizche terjimiside ilgiri ishlitiliwatqan inglizche «Nationalities» sözining ornigha, millet sözining xitayche ahang terjimisi «minzu» ning eynen élinishi ghulghula qozghighan idi.

Tordashlarning bu heqtiki inkasliridin melum bolushiche, milletler uniwérsitétining mektep derwazisi aldigha ésilghan wiwiskida we bu yil oqughuchilargha tarqitilghan mektep iznikide, mektepning «Central University for Nationalities» dégen eslidiki inglizche nami «Minzu University of China» gha özgertilgen. Undin bashqa guyju milletler uniwérsitéti, gherbiy shimal milletler uniwérsitéti qatarliq mekteplerdimu oxshash ehwal yüz bergen.

Xitay merkizi milletler uniwérsitétining dotsénti ilham toxti ependi bu heqte toxtilip, bu mekteplerning inglizche ismidiki millet uqumini bildüridighan «Nationalities» sözining xitayche ahang terjimisi boyiche eynen élinishining emeliyette, xitayda yéngidin kötürülüp chiqiwatqan, millet uqumi hem millet éngini suslashturush xahishining ipadisi ikenlikini bildürüp, bolupmu 5-Iyul ürümchi weqesidin kéyin bu xil xahishning barghanche küchiyiwatqanliqini ilgiri sürdi.

Ilham toxti ependining qarishiche, nöwette xitayda millet uqumini suslashturush terepdarliri bilen millet we milliy kimlik mesilisini tekitligüchiler otturisidiki bes-Munaziler küchiyishke bashlighan.

Söhbitimiz dawamida ilham toxti ependi yene, xitay hökümitining nöwette xitaydiki uyghur, tibet, mongghul qatarliq milletlerge qaratqan milliy siyasiti heqqidimu toxtilip, nöwette yürgüzüwatqan milliy siyaset hem xitayda barghanche küchiyiwatqan milliy ang we millet uqumini suslashturush xahishigha chek qoyulushi kéreklikini tekitlidi.

Copyright © 1998-2011 Radio Free As

http://www.rfa.org/uyghur/xewerler/tepsili_xewer/ilham-toxti-07262012152659.html/story_main?encoding=latinia. All rights reserved.