Ilham toxti: “hökümet dairilirining gheyret niyaz üstidin adil höküm chiqirishini ümid qilimen”

Bügün uyghurbiz torining sahibi, merkizi milletler uniwérsitétning dotsénti ilham toxti ependi, xitayning uyghur aptonom rayoni qanun organliri teripidin, “dölet bixeterlikige ziyan yetküzgen” dégen jinayet bilen eyiblinip, bügün sot échilmaqchi bolghan, shinjang iqtisad gézitining muxbiri gheyret niyaz délosi heqqide ziyaritimizni qobul qildi. Ilham toxti ependi gheyret niyaz heqqide öz qarashlirini otturigha qoyup, gheyret niyazning gunahsiz ikenlikini, hökümet dairilirining gheyret niyaz üstidin adil höküm chiqirishini ümid qilidighanliqini bildürdi.
Muxbirimiz mihriban
2010-07-21
 
gheyret-niyaz-305
Gheyret niyazning süriti
Photo: RFA
 

Xitayning uyghur aptonom rayoni qanun organliri “5 – Iyul weqesi”din kéyin, chetel muxbirlirining ziyaritini qobul qilghanliqi hem hökümet dairilirige uyghur aptonom rayonidiki milliy siyaset heqqide teklip sunghanliqi üchün, “dölet bixeterlikige ziyan yetküzgen” dégen jinayet bilen qolgha élinghan, shinjang iqtisad gézitining muxbiri gheyret niyaz ependi üstidin bügün yeni 21 – Iyul küni sot échilidighanliqini uning ailisige uqturghan idi. 

Gheyret niyaz délosigha yéqindin köngül bölüp kéliwatqan dostliridin, uyghurbiz tor békitining sahibi, musteqil tetqiqatchi ilham toxti ependi bügün ziyaritimizni qobul qilip, bügünki sotning konkrét ehwali heqqide gheyret niyazning ayali risalet xanim hem dostlirining hazirghiche birer éniq uchur alalmighanliqini bildürdi. 

Radiomiz igiligen eng yéngi melumatlargha asaslanghanda, bügün dunya uyghur qurultiyi bu heqte bayanat élan qilip,gheyret niyaz dilosi heqqide échilidighan sotning kiler heptige kichiktürülgenlikini bayan qilghan. 

Ilham toxti ependi özining bir saet ilgiri gheyret niyazning ayali risalet xanim bilen yene paranglashqanliqini, risalet xanimning éri gheyret niyazning gunahsizliqini tekitlewatqanliqini, gerche ürümchide gheyret niyaz üchün bir adwokat belgilengen bolsimu, emma gheyret niyazning telipige asasen ayali risalet ilham toxtidin gheyret niyaz üchün béyjingdin adwokat tépip bérishni hawale qilghanliqi üchün, özi we dostlirining gheyret niyaz üchün adwokat izdewatqanliqini bayan qildi. 

Ilham ependining bildürüshiche, gheyret niyaz bultur 9 – Ayda chetel muxbirlirining ziyaritini qobul qilip, “5 – Iyul ürümchi weqesi” heqqide öz qarashlirini bayan qilghan. Shundaqla maqale yézip uyghur aptonom rayoni hökümet dairiliri hem chetellerde paaliyet élip bériwatqan rabiye qadir xanim qatarliqlarni birla waqitta tenqidligen. Eyni chaghda gheyret niyaz uyghur aptonom rayonluq partkom sékrétari wang léchüenni rayonda qattiq qol siyaset yürgüzgenliki bilen eyibligen. Shundaqla hökümet dairilirini agahlandurup, rayondiki yerlik uyghurlar bilen köchmen xitaylar otturisidiki munasiwetning jiddiyliship ketkenlikini, shunga hökümetning weziyetni kontrol qilish üchün tedbir qollinishi kéreklikini otturigha qoyghan. Gheyret niyaz öz bayanlirida hökümet dairiliri terepte turup sözligenliki üchün, eyni chaghda dölet ichi we chetellerdiki uyghurlar arisida gheyret niyazning qarashlirigha nisbeten naraziliq keypiyati kötürülgen. Lékin mana mushundaq kompartiyige sadiq bir kishimu hökümet dairiliri teripidin qolgha élinip, sotlinish aldida turmaqta iken. 

Ilham toxti ependi, uyghur aptonom rayonluq hökümet dairilirining gheyret niyaz délosini adil bir terep qilidighanliqigha ishinidighanliqini bildürüp, özining yenila gheyret niyaz délosigha nisbeten ümidwar keypiyatta ikenlikini ilgiri sürdi. 

Ilham toxti ependi sözide, metbuatlarning hem teshkilatlarning gheyret niyaz délosini siyasilashturmasliqini, gheyret niyazgha nisbeten aldi bilen uning öz millitini söyidighan, heqqaniyetni yaqlaydighan, rast gep qilalaydighan yaxshi muxbir, öz wijdanini yoqatmighan bir uyghur ziyaliysi süpitide muamile qilish kéreklikini tekitlidi. 

Gheyret niyaz ependi bu yil 51 yashta bolup, chöchek shehiridin. U 1982 – Yili merkizi milletler institutining junggo edebiyati fakultétini püttürgen bolup, xitayda tonulghan zhurnalistlarning biri. U ilgiri – Kéyin bolup, shinjang qanunchiliq gézitining muawin bash muherriri, ishxana mudiri, ” qanun mejmuesi”zhurnilining muawin bashliqi, shinjang iqtisad gézitining muxbiri qatarliq wezipilerni ötigen. Shinjang iqtisad gézitining muxbiri bolup ishligen. Gheyret niyaz ependi yene, uyghurbiz tor békitining aktip bashqurghuchilirining biri. Gheyret niyaz ependi qolgha élinghandin kéyin, uyghurbiz tor békitining sahibi, musteqil tetqiqatchi ilham toxti ependi, üzlüksiz halda uyghurbiz tor békitining xelqara tor békitide hem chetel metbuatlirining ziyaritini qobul qilghinida, gheyret niyaz ependi heqqide toxtilip, uning gunahsiz ikenlikini, xitay hökümitining gheyret niyazgha oxshash kishilerge nisbeten adil muamile qilishini telep qilip kéliwatqan idi. 

Yuqiridiki ulinishtin bu progirammining tepsilatini anglighaysiler.

 

发表评论

Fill in your details below or click an icon to log in:

WordPress.com Logo

You are commenting using your WordPress.com account. Log Out / 更改 )

Twitter picture

You are commenting using your Twitter account. Log Out / 更改 )

Facebook photo

You are commenting using your Facebook account. Log Out / 更改 )

Google+ photo

You are commenting using your Google+ account. Log Out / 更改 )

Connecting to %s